أم كلثوم !
بقالي فترة عاوزة أكتب حاجة عنها
بكتب بالعامية !
جريمة :)
حالة من التفرد في المعنى والحب والشوق والهجر والعتاب
حالة من التفرد في الإبداع ... وانتقاء الكلمات والألحان
كل واحد صاحب آلة مستمتع باللي بيعزفه واللي بيسمعه
سيمفونية !
مشفتش في حياتي كده !
مكنتش بحب أم كلثوم لأن كل اللي حواليا كانو بيحبوها وبيمجدوها جدا ... وكنت مش فاهمة ليه بيعملوا كده !
عامة أي حاجة ماما تقول فيها شعر بكرهها تلقائي ! غلاسة بقى ... جنان المراهقين ... قال يعني أنا كده ليا شخصية ؟ معرفش يمكن كل دول ... بس ماما وبابا من عشاق أم كلثوم ... خاصة بابا ... وبامتياز !
بدأت أفهمها في المرحلة الجامعية !
بدأت فعلا أسمع الكلمات
آخد بالي إزاي اللحن متناغم جدا مع كل حركة ونفس وتنهيدة منها أو من الأوركسترا اللي وراها !
بدأت أتأمل في حفلاتها التليفزيونية المسجلة ملامح الناس وراها ........ حالة من الاندماج الرهيبة ! الرائعة فعلا !
الناس دي حابة اللي بتعمله ومستمتعة بيه
أم كلثوم بتدي لمعاني الكلمات معاني أعمق بتلوين صوتها ... صوتها اللي بيدي بعد جديد ومصداقية جديدة للقصة اللي بتغنيها !
أنا بسمع دلوقتي " هو صحيح الهوا غلاب ؟ " هي تقول معرفش أنا ... وأنا كمان ! والله ما اعرف يا ست بس شكله كده !
نظرة وكنت أحسبها سلام وتمر أوام أتاري فيها وعود وعهود ... عهود لا تصدق ولا تنصان .. عهود مع اللي ملهش أمان ! وصبر على ذلة وحرمان ووقت ما أقول حرمت خلاص أقول يارب سيبني كمان ... إزاي يا ترى أهو ده اللي جرا وأنا معرفشي !
صوتها وهي بتقول معرفش أنا ... إحساس وهي بتقول عتاب ... يقول إنها هتقرر الفراق والهجر في الكلمات الجاية
صوتها وهي بتقول أقول يارب سيبني كمان ! يخليك تدوب في حالة إنت عشتها أو بتعيشها .. أو حتى بتسرح فيها معاها فتعيش معاها القصة بتفاصيلها
أم كلثوم !
لما غنت سيرة الحب ....... إنت عمري ........ لسة فاكر ....... حيرت قلبي معاك .......... دليلي احتار ...... أمل حياتي ........ ألف ليلة وليلة ...... الأطلال ......وغيرهم
كل أغنية بتكلمك إنت ........ بتكلم حاجة جوايا ........ كلام كتير كنت أسمعه لأول مرة ويصادف وجودي بالحالة دي !
كنت بتعجب من قدرة الشاعر على التعبير دي ....... بس كان بيجنني قدرة صوتها وإحساسها على التعبير بالعمق ده !
كانت تقول الآه كأنها خارجة من جوايا !
كنت بحس إن إرسال أغنية لأم كلثوم للي عاوز تعاتبه أو اللي عاوز تقوله بحبك دي أروع وأجمل وأسهل رسالة !
دونا عن باقي المغنين
أم كلثوم حالة إبداع متفردة !
فهمت دلوقتي ليه ليها عشاقها ............ وليه كانو بيسكتوا تماما أدامها !
عشان ببساطة كانت عارفة تقول كل الآه اللي جواهم .......... وعارفة تعبر عن اللي عجزت كلماتهم عن البوح بيه !
القوة والضعف
العشق والذوبان في المحبوب ........ والقوة والكرامة والكبرياء ....... اللين ....... والقسوة ....... العقل والعشق في نفس الأغنية بتغير موجات الكلام والأنفاس والتنهيدات وكل حاجة !
أوركستر كان عاشق للفن ........ عاشق للحالة ........ فاهم كل حرف بيتغنى ... منسجم .... مندمج جدا ......... حالة مختلفة وملكوت تاني مع صوت وإحساس أم كلثوم !
حالة رائعة
وليها حق تبقى ......... السيدة أم كلثوم :)
ليست هناك تعليقات:
إرسال تعليق