دعوة حب
وبَدعيلهم
يدوقوا الحب ويَّـا هناه
يقولوا آمين !
وأقول جوايا ... أكيد سامع
مَلَك واتنين
يقولوا آمين
وليكـِ بمَـثْـل أو مِـثْـلين
يسرَّع دعوتي لله
كلام مَـلَكين
بإني ألقاه
بشوق واقف كما الخنجر
ما بين ضلعين
بقيت بدعي لطوب الأرض
لو يعشق !
لكل اتنين ليتقابلوا
لكل حبيب لو يرتاح
في حضن اللي بات عاشْـقُـه
وتصبح
طيور الأرض متصالحة
مع الأشجار
مع الورد ومع الياسمين
وبدعي حتى للمطرة
تعانق على الزهرة
قطر الندى .... وتتباهى
بحب يعرفه العاشِقين
ويحلفوا بيه !
وتفضل دعوتي في قلبي
بإني يارب لو عاشقاه
تنوِّل قلبي وصْل هواه
بإني يارب لو شاردة
في علم سيد الأكوان
وسالكه طريقي من غيره
مع السالكين
تقَدَّرني يارب أنساه !
وأنسى لوعتي وجواه
وأنسى شوق ضلوع صدري
لنبضة قلبه من جُـوَّاه
وإمتى أصحى متصالحة ؟
على نجوم ليل كانت ويَّاه
بتحكي وتتحاكى باسمي
وهو يقول حكاويها
لقمر الليل
وسهر الليل
لنسمة جاية تتسحب
وشايله من عبير ريحته
وتحكيلي
وأنا .... بنساه !
بإن الشوق واكل عقله
وإني في الحكاوي معاه
وإني ودمعتي المرّة
عيال خايبة
ما تعرف إن ليل العشق
فيه سِـرُّه
وفيه شوقه مع أمله
أكون وياه !
دي دعوة حب محتارة
لرب كريم حكيم في سماه
يزيل حيرتي يزيل تعبي
ينور بالهدى بصيرتي
ويديني أمل يمكن
أعيش معنى جديد وحياة
وأهي دعوة
بكل الحب يا سامعين
ينول كل مشتاق حب
ينولكم حلاه ... آمين
ليست هناك تعليقات:
إرسال تعليق