هاخد المخدة وانام !

هاخد المخدة فحضني
وهنام ومحلمشي
وأتمنى قبل ما أنام
روحي مترجعشي
فرق الحياة مالموت
كلمة وصرخة حق
قالها شهيد محروق
قالها السجين ونطق
قام اتخنق بالغدر

هاخد المخدة وأنام
من غير ضجيج أحلام
أصل الحلوم في يومين
ملت أسامي الناس
تعبت من المشاوير
عند الشهيد بتمام
وأهو طول الليل رايحة
تجري بقلب حزين
تنبش قبور الظلم
يمكن تلاقي مكان
تزرع ورود عالقبر
تزرع كمان يسامين
يقتلها قال سجان
كان ماشي عالصبحية
يحمي بليله كمين
شاف الورود طلة
قال زرعة الشياطين !

هاخد المخدة وألالي
بين النجوم مووايل
تحكي قصص لصغار
بين الكفن نايمين
وردة سبعتاشر
ياسمينة العشرين
شاب في حمار خده
شامة وزغب شريد
طالل على دقنه
وسماره لون النيل

هاخد المخدة وأغني
خد الطلقة واسكت
خد الطلقة ونام
وأحلم بسجن فسيح
ضيق كأنه القبر
فيه الأمين بيصيح
قوموا يلمكو جبر
فيه نقطة المية
تروي جنون الروح
نامت في حضن الليل
جالها أوان تسهر
فيه كلمة الجلاد
قرآن بليغ وفصيح
فيه زعقة الظباط
رعد في صبيحة صيف
قاتل ضياها القيد
في ايدين صبي مليح

هاخد المخدة وأنام
هاخدها وأغمض غصب
وأقول عشر مرات
قتلوا بلادي غصب
وأقول كمان عشرة
أخدوا جناحي غصب
وأقول لعشرة أخيرة
بعد الصحاب ماتموت
العيش بيصبح غصب

#قهر #مصر #وجع  هلوسة موجوعة