يمكن وداع ... يمكن نتلاقى

 مساء الخير

أعتقد إني ولفترة غير معروفة (يمكن للأبد) هتوقف عن الكتابة في المدونة دي

ليه؟

طبعًا حق الناس المستمرة في المتابعة والقراءة تعرف، بس الحقيقة معنديش سبب معين، غير إني مش عارفة أكتب، أو مش قادرة أكتب وأحيانًا مش فاضية أكتب

وإني الفترة الأخيرة مبقتش راضية عن مستوى كتابتي بشكل عام، لدرجة إن قصاد كل تدوينة بيتم نشرها حوالي اتنين تلاتة بيتم  تحويلهم لل درافت بدون نشر

يمكن لإني بقالي فترة اللي بحتاج أقوله وأعبر عنه بقوله بشكل مباشر للي مهتمة بيهم وبحبهم

يمكن لإن انشغالي بحياتي بقى أكبر من انشغالي بالحاجات اللي بنقلها في كتابتي

حقيقي معنديش سبب مباشر!

وحقيقي عندي تخوف معرفش أكتب تاني مع مشاغل الحياة، زي ما بطلت أكتب شعر من سنين يمكن قبل حتى ما اظبط مجموعة القصايد اللي كان نفسي أنشرهم واللي كانوا مؤهلين للفوز في اكتر من مسابقة شعر

أنا شاكرة وممتنة حقيقة لكل حد بقى بيني وبينه صلة الكتابة، ممتنة لكل اللي كان بيدخل يقرا اللي بكتبه، حتى لما تحولت كتابتي في فترة كده لكتابات كئيبة بس تقريبًا، كان فيه ناس لطيفة بتدخل وتقرا بردو

بس الحقيقة ده مش أنا، صح بقى جزء مني، لكن دايما كان ويظل الجزء الأكبر بيحب الحياة، وبيحب الحب، وبيحب البحر والورد والخضرة المزيكا والرقص والغنا والانبساط والنكتة الحلوة والأكلة الطعمة اللذيذة

فكرت من فترة إني ألغي المدونة تماما، أقفلها أو أمسحها خالص، ولكن مش هيكون فيه فايدة من قفلها، يمكن لما حد يعدي من هنا ويقرا حاجة تلمس قلبه ويتبسط، أنا كمان هتبسط

ولو لمست وجعه وبكى وسيط كتير، يعرف إني كمان بكيت، لو كانت الدموع تتحول دم كنت أقول إني بكيت دم في وقت طويل للأسف

لكن أهو، أديني أهو، الدنيا بتشيلني مرة وتحطني مرة، وكل مرة أقع واجي أعيط ألاقي بسرعة حضن جاي يواسيني ويلملمني

عزيزي القارئ عزيزتي القارئة اللي يمروا من هنا يستحملوا رغيي وكلامي

يأسك وصبرك بين إيديك وانت حر

تيأس ما تيأس الحياة راح تمر

أنا دقت من دا ودا لقيت الصبر مر

وبردو اليأس مر 

وعجبي #صلاح-جاهين

بس كله بيعدي، مش لازم ينتهي، لكن مش هيرجع يوجعك بذات الكيفية

عزيزي الموجوع اللي يمر من هنا، اعرف يا صديقي ويا صديقتي إني مريت بمحاولات انتحار، وإني مريت بأيام أسود من قرن الخروب، وإني اتعرضت لعدة صدمات عصبية ونفسية، وإني جالي في يوم من الأيام انهيار عصبي ومازلت بعاني من أثر كرب ما بعد الصدمة، وإني شفت أيام من صعوبتها كنت بقول مش هيطلع عليا نهار، ونهارا صعبة ومؤلمة قلت مش هييجي عليا المسا، لكن طلع بعدها نهار ونهار، وجه مسا وليل وطلع قمر كمان

صاحبت وفارقت وعرفت ناس وناس عرفوني، واللي حبيتهم محبونيش، واللي اتضايقت منهم وكرهوني بقوا اكتر ناس تحلف بحياتي وجدعنتي معاهم، هي الحياة كده، على كل لون، متخافوش، لو النهار مش بكرة هتبقى فل وكماننا وكده.

ادوا الحياة فرصة، وادوا نفسكم فرصة، وحبوها، وحبوا نفسكم، وحبوا اللي بيحبوك ومخلصين ليكم بجد

وأي لون رمادي لو بدأ يبقى مزعج، ابعدوا عنه، وفروا طاقتكم للحياة

ادوا من قلبكم واخلصوا، متخافوش والله، كل الحب اللي بيطلع هيرجعلكم، في صور كتير آوي، صور جميلة آوي

وكل حاجة وحد خذلكم، مش مهم، مع السلامة، هييجي الأجمل والألطف والأرق والله، تكونوا مش مصدقين اد ايه جميل ولطيف، واد ايه قلبكم يتملي من تاني بالمحبة والخير والسعادة

ولو بتفكر إن الحياة تقلت وعاوز تمشي أو تموت، صح، هي تقلت، وكتير مكنتش قادرة اشيلها، بص للسما وقول دايما يارب تقلت آوي عليا، ساعدني وارفع تقلها عني، اطلب من ربنا يشيل عنك، ويدي لراحة بالك وطيب خاطرك فرصة تانية ويديك

ساعات الصبر بيكون تقيل ومر، يوم لما يتقل بص عاللي معاك وجرب تعد الحاجات الجميلة، تتبسط آوي

وسط غربتي، وسط نوبات الأرق الصعبة، وسط الحرب اللي كانت عليا في شغلي، وأنا لوحدي، محدش معايا، بس ربنا موجود، قعدت في ليلة في نص السرير في الاوضة الواسعة والفراغ جوة بيتي وبرة، قلت لنفسي أنا هعد كام نعمة عندي الليلة 

عندي كذا، عندي كذا، عندي كذا ... لحد ما رضيت، وحسيت إن عندي حاجات كتير، بسبب وجودها فكرناها عادي، فكرناها أمر مسلم بيه، افتكرت اليوم اللي كنت بصرخ فيه من الألم، وإن الحمدلله النهاردة الألم ده مش موجود

مفيش شيء بيدوم، لا سعادة، ولا حزن ولا ألم ولا مرّ

اللي بيدوم الرضا

ربنا يرضي قلوبكم ويرضيني ويرضي قلبي كمان معاكم

تصبحوا على خير

وليلتكم سعيدة

ويا الله نقول ... إلى اللقاء 

لـربما