الثلاثاء، 26 يوليو 2016

عزيزتي القرحة .... أما بعد!

عزيزتي القرحة .... صباح الخير

أعتقد وصل لحضرتك أخبار حالتي النفسية اللي مش حلوة خالص يعني

وأعتقد كمان حضرتك ملمة بهذه الظروف المريرة التي تمر بها البلاد في داخلي!

وأعتقد إنه لا يخفى عليكي في هذا الوقت من الظروف بكون محتاجة أشرب قهوة أكتر وأكل شيكولاتة أكتر!

الحقيقة أنا بحاول أراعي مشاعرك على أد ما أقدر يعني، اليوم اللي بشرب فيه قهوة مش باكل فيه شيكولاتة أو مش باكل فيه من برة، أو مش باكل حاجة مقلية أو فيها حوامض!

أعتقد كمان إنه عشان خاطرك استغنيت عن إكسير الحياة في حياتي الشتوية، عصير البرتقال الفريش اللي بعشقه، وعصرت على دماغي تفاحة عشان الليمون بيتعبك، وباكل تفاح زي الحمار في النجيلة عشان أعجب!

كمان بقالي يومين أهو ملتزمة وباخد حباية المعدة، صحيح اليومين اللي فاتو كنت بنسى بس متنكريش إنك أولوية بردو مش استهتار بشأنك لا سمح الله، والدليل أدامك أهو نسيت أخد البخاخة خالص امبارح لما صحيت النهاردة شوكماني بايظ!

فياريت نراعي بعضينا بقى وتعرفي إني النهاردة فعلا محتاجة مج النسكافيه عشان أفرغ بيه بعض مكنوناتي وأتصبر بيه على الحياة البائسة اللي احنا مشاركين بعض فيها دي :)

صحيح جنون الرائحة الغجرية للقهوة فقد سحره عليا!

صحيح جنون الرائحة الناعمة للكيك مبقاش بيجيبني على وشي عشان أكل كب كيك ، بس إنت أكيد عارفة هم ليه فقدوا سحرهم!

حقيقي يا معدتي بيكون نفسي نتشارك فنجان القهوة الصبح مع حد يحسسني أنا وانت بسحر وجنون القهوة :)

أو نتشارك أنا وانتي الكيك مع حد بنحب نتفرج عليه وهو بياكله!

معلش .... مش دايما الحياة بتمشي زي ما نفسنا لازم نلاقي مطبات كده، عشان نعرف قيمة الأخضر اللي كان قبلها، ويمكن الأخضر اللي بعدها كمان، ماهو مفيش إشارة عالمطبات يعني مش هنفضل في مطبات طول حياتنا!

وعليه يا معدتي العزيزة إنتي وجرثوماتك وقرحك وكل الحاجات دي، وبالمرة ياريت تنادي السيد القولون وتقوليله يسمحلي معاكي النهاردة بفنجان القهوة دي!

على أن أعدكم وعد شرف إني هفضل أمدكم وأعزز موقفكم بمزيد من الزبادي واللبن الرايب والتفاح والحاجات دي!

وإني أستمر على تظبيط مزاجكم بعد الوجيات الدسمة بمج شاي أخضر!

وإنتو عارفين كويس إني جدعة وبلبعت شاي أخضر ورايب ورا بعض عشان أرضيكم!

والسلام ختام!

ليست هناك تعليقات:

إرسال تعليق