ما تعودتش أكتب النوع ده من الرسايل !
مش حاسة إني هموت ويومي قرب وكده والجو ده ! بس مين يعني هيعيش للآخر ؟
كل خوفي إني بكرة أنزل وأرجع من غير حد نزلت معاه !
أو منزلش ......... وألقى صديق الناس شايلاه !
ناس بتودع
ناس بتعيط
ناس رايحة وراه !
كل الخوف في بلادي دلوقتي في دمعه وآه ؟
كل الخوف جوايا دلوقتي ..
أخاف ملحقش ...
صورة معاه ...
كلمة معاه ...
حضن بشيل فيه وجع الليل الفايت
كان أوجاعه حرة ومرة
كان أوجاعه مليون اسم بخاف أنساه !
هبدأ أهوه
هكتب اسم وذكرى ودمعة وضحكة وحضن
هكتب أهوه
لمة وجامعة ورحلة وفرحة ومليون حزن
أيوة خلاص
أسفة بطول
اسفة يا قلمي
باظت القافية
نعيد مالأول
كان أول وزن لكلامي
كلمة آه ؟
كلمة لااا ؟
كلمة بلون السجن
ولا بحضن؟
ولا بطعم الآه والمر
ولا بفرحة
بفستان دخلة
ولا بلون الورد الأبيض
لون الحُــر !
ضحكة أحمد في الزنزانة ؟
دايرة معانا
في كل قوافل خير رحناها
كان ويانا
دي كده الأول
كان مشهور جدا بيطابته
كان برسالة
ممكن يجمع ألف جنيه
لناس غلبانة
بدل الواحد صاروا اتنين
احمد .... عمرو ... وعبدالخالق !
حتى قالولي صلاح الدين !
عبد الرحمن ؟ مات هو كمان ؟
وصلوا لعشرين ؟ !!!
حتى محمد الشقيان راح في الرجلين ؟
لف يا قلمي وارجع تاني
باظت القافية
ليه تنسيني ! وليه بتنساني
يللا تعالى نعيد مالأول
لما حمامنا صار بجناح
لأ جناحين
فات من وسط ظلام السجن
بين رصاصين
ساب غربان الجيفة من العواجيز
بسواد الريش
راح ناحية نور جاي مالطاقة
حب يعيش !
خد كل أحلامه وحبايبه
خد جناحاته وحلم طفولته
قتل الخوف جواه واتحدى
بس خسارة ..... هوب رصاصة
كأنه مكنش ... كان النور ده غش وكدب
كأنه مفيش !
هبدأ أهوه
أصل القافية صعبة عليا
بدل الكلمة بكتب مية
بدل الوزن ما يظبط مرة
يقعد يهرب مليون مرة
أمسح وأكتب تاني في قافية
لسة كلامها صعب عليا
هبدأ زي كلام أفراحنا
كأن الفرح داير حواليا
لا انفجارات
لا اعتقالات
لا ناس بتموت جوة الجامعة وفي الكلية !!
كأن خلاص .... كأن وبس ... كأن الدمع مهوش في عنيا
طب اقول ايه ؟
ايه مفروض الناس بتقوله ؟
رسالة حب ؟
في خطاب وداع من غير اسم ؟
كلمة ذكرى لصحبة عمري هيبكي عليا وهبكي عليه ؟
أكتب وأنا مشتاقة لحضن ؟
كلامهم كان أحضان بتخفف كل غباير العمر الأزرق
نابهم أزرق
خطفوا الضحكة من شفايفنا وزرعوا المر
حتى الصحبة كلام بنقوله علشان ننسى واقعنا الاسود
واقع مر !
بسم الله
هبدأ أهو
يا كل أصحاب عمري الحلوين بضفاير سودا وشريطتين
مين غايبة ؟
بلاها بنات !
يا كل أصحاب عمري الجدعان
مين قال فين ؟
سجن وسحل وفيه شهيدين ؟
بلاها ولاد
يا قلمي وفكري وورق كشاكيلي الصابرين
بتقول ايه ؟
معتقلين !
حتى الفكرة يا ناس قتلوها في كلابشين ؟
مين هيشيل الصندوق الاخضر ؟
مين حيبعتلي الياسمين !
حرّة ظابط ؟
دبورتين ؟
في القبر ملايكة مش حراس
مش زي الناس
قافل شفايفهم ختم النسر
عن الظالمين !
آدي اخر الورقة !
مكتوب توقيع !
في راس رسالتنا ؟
وفين مضمونها غير ترقيع
آخر سطرين
يا كل أصحابي في الشهدا وفي الصاحيين وفي الأحرار وفي الزنازين وفي الثوار وفي الساكتين
بنور الشمس راح نحلم .. أكيد الحلم له جناحين .. أكيد في الشوك هناك مخرج أكيد خارجين
أكيد المسجونين منا منسيوشي كلام الحر في الميادين
أكيد الثايرين منا مسكتوشي بخوف زنازين
أكيد الحالمين فينا مبطلشي حلمهم يجمع ما بين الحب والثورة ما بين العاشقين للنور وبين الشمس تكسر سحاب الأرض متعسكر لكن مين على الشعاع يقدر ... يفوت يفتح لنا الدنيا ... شعاع مكسور بيتقابل مع شعاع تاني بيقاوم بقم شعاعين !
برغم ظلامية المشهد لكن رسمة بتفتح نور على البسمة ويبقى الحلم للعاشقين رجوع ثورة تنادي باسم شهدائنا على الميادين وتفتح للأمل طاقة .. تفجر نورها في الزنازين على الثوار على الأحرار على الشبل اللي شب هناك مع العتمة وواحشه النور على القبر اللي كان مفروش عليه ياسامين !
توقيع
مابين العايشة والميتة
مابين النور والعتمة
ما بين سجن الحياة الأوسع
وبين أشواقها للثورة
أهي عايشة كما الميتة
تنادي النور على الميادين
بصراحه .. تأثرت بيها جدا .. تسلمى ياساره .. دمتى رائعه دايما :)
ردحذفتسلملي يا علي :)
حذفمؤثرة جدًا يا سارة :(
ردحذف